香港好多業主都會買樓收租投資，一旦遇到租霸點算好？香港法律常被詬病對業主保障不足，如遇上租霸唔交租玩嘢，諸如租客失蹤、經常拖租；土地審裁處最多幫業主收返層樓，但拖欠嘅租金就要業主自己諗方法追討，最終廢時失事，租霸嘅目的好簡單，唔交租亦唔走人遷出，一心做賴皮狗，業主不幸遇到租霸可以點做？本文同你分享7大租霸常用招數及技倆，幫各位業主見招拆招！
好多職業租霸以公司名義簽租約，目的是以有限公司名義拖欠租金，租客本身並不需要負上債務責任，而且開設公司程序簡單，如果你正面對有人以公司名義同你簽租約，除非你對租客有信心，又或者對方能一次過繳付一年租金，否則都係勸佢用返個人名義簽約，為自己爭取更好的保障。
選擇假日向業主支付兩按一上並以支票付款，各位就要留意喇，租霸會在假日以支票付款及催促業主即時交出鎖匙，因為假日支票無法兌現，之後要再追返鎖匙已經響人地度，大大增加追究難度，然後當支票未兌現有諸多藉口，業主應該堅守未見錢不交匙的原則，最多放棄一個疑似租霸，否則業主未來有機會輸更多。
租霸亦會選擇避開地產代理直接同業主聯絡簽約，美其名係為大家慳佣金，實際係想整個租賃協議出現程序問題，例如唔打釐印等手續，自訂合約亦比較簡陋，目的係加大業主追討欠租的難度，所以租樓最好透過專業代理，有較大的保障保障雙方。
租霸為促成業主同意租約，會假裝接受一個比市場高嘅租金，不過會同時要求業主減低兩按一上所收嘅金額，呢種職業租霸會同意接受租金比市場高，因為佢從來冇打算要交租，所以唔好因小失大，坊間咁多租盤，佢何解偏偏揀個貴啲嘅嚟租？業主必須小心分析留神，俾啲耐性揀個好租客。
有經驗嘅租霸會自稱係做公務員或專業人士，增加業主嘅信心，但除咗只有身份證同銀行月結單外，工作證明、糧單、稅單都唔會提供到，租出單位前業主必須好好審視租客的職業資料及背景，如果租客愈逃避提交個人資料或入息等交件，租霸指數愈高，網絡部分社交群組都有集合租霸資料，大家不妨查詢一下。
租客如果遲交租唔屬於罕見，畢竟每人都有困難嘅時候，但租霸遲交租一般超過一個月，而且你亦好難搵到佢，電話唔聽、訊息唔覆又或已讀不回，如果經常出現呢個情況，亦唔係冇佢符，只要租客拖欠租金超過15日，業主權益係可以從民事途徑追討所有拖欠嘅租金，並立即終止租約及收回物業（向土地審裁處查詢）。
如果催租時被租客恐嚇你，話會整爛你單位，老實講如果佢嚟真，你亦防不勝防，業主唔到最後一刻都唔知單位嘅情況，好多時呢類型租霸都會想盡辦法唔同業主面對面交收單位，留低鎖匙及一片頹垣敗瓦，業主應該相約租戶面對面退回按金，如有租金拖欠並拒絕以按金作繳，租客又多番拒絕見面，一定有唔妥，最好搵多個朋友一齊去收返間屋，有備無患。
租霸行為非常討厭，業主除咗簽約前小心謹慎之外，亦有自保嘅方法，例如網上有免費或收費嘅租霸名單，但資料來源不詳，可以有機會避開某些租霸慣犯，但亦比不上買業主保險，坊間有保險公司嘅保險產品可以提供租金保障，一般以半年或一年租金作主流保障，業主可依照出租單位的大小，選擇適當的保障額及保費，中國平安、保誠保險、蘇黎世保險都有提供相關保險服務，詳情可自行向各保險公司查詢。
🔧 Digest:ec4470...